Cliciwch ar y cyswllt yma i weld y Strategaeth Gwarchod Natur drafft ar gyfer Bae Caerdydd, Awdurdod Harbwr Caerdydd. 

Dogfen Ymgynghori Strategaeth Gwarchod Natur  (935k).

Os dymunwch gynnig sylwadau ar unrhyw agwedd o’r ddogfen, anfonwch e-bost at dahall@cardiff.gov.uk.

Ym 1992, daeth Uwch-gynhadledd y Byd y Cenhedloedd Unedig yn Rio de Janeiro i ben â chytundeb ar bwysigrwydd cynaliadwyedd a bioamrywiaeth. Ateb Prydain i’r sialens a osodwyd drwy’r trefniadau hyn oedd paratoi Papur Gwyn 1990 yn dwyn y teitl “This Common Inheritance”, a oedd yn datgan ymrwymiad y Llywodraeth i ddatblygiad cynaliadwy.  Ym 1994, cyhoeddwyd dwy strategaeth, un ar ddatblygiad cynaliadwy a’r llall o’r enw ‘Biodiveristy – the UK Action Plan’.  Darparodd y dogfennau hyn y fframwaith i Awdurdodau Lleol (ymhlith eraill) i baratoi eu cynlluniau eu hunain ar gyfer cyflawni datblygiad cynaliadwy a gwarchod bioamrywiaeth.

“Meddyliwch yn Fyd-Eang, Gweithredwch yn Lleol”, ydyw’r ymadrodd sy’n cynrychioli’r agwedd hon orau. 

Ar lefel leol, cynhyrchodd Cyngor y Ddinas Strategaeth yr Amgylchedd ar gyfer Caerdydd yn 1990.  Cymeradwywyd Strategaeth Hamdden Caerdydd ym 1994 gan gadarnhau’r angen i ddiogelu’r ardaloedd a ystyrir yn werthfawr o ran gwarchod natur o fewn ffiniau’r Ddinas. Ym 1996, cyhoeddwyd Cyfarwyddiadau Cynllunio Atodol i Gynllun Lleol Dinas Caerdydd drwy ddogfen o’r enw ‘Strategaeth Gwarchod Natur Dinas Caerdydd’.  Y ddogfen ddiweddaraf a baratowyd gan Gyngor Sir Caerdydd mewn perthynas â Bioamrywiaeth oedd ‘Yn Wyllt am Gaerdydd’, Cynllun Bioamrywiaeth Lleol Caerdydd, ym Mawrth 2002.

Er bod y dogfennau a restrir uchod yn darparu mewnwelediad i amgylchedd naturiol Caerdydd gan nodi dyheadau’r Cyngor o ran gwarchod natur, fe’u paratowyd cyn adeiladu Argae Caerdydd a datblygiad y llyn dwr croyw y tu cefn iddi.  Bwriad y Strategaeth Gwarchod Natur ydyw atodi’r cyfarwyddyd blaenorol gan Gyngor Sir Caerdydd, a gweithredu fel dogfen sy’n manylu ar ba rywogaethau sy’n bresennol ym Mae Caerdydd a pha waith sy’n gysylltiedig â diogelu’r amgylchedd newydd a datblygol hwn.   Dylid pwysleisio er bod Bae Caerdydd yn gymharol newydd, mae eisoes wedi datblygu’n amgylchedd o ansawdd.

O ddewis, dylid magu agwedd gydlynol at warchod natur ym Mae Caerdydd.  Wrth i ddatblygiadau newydd gael eu hadeiladu, mae’n rhaid cael dogfen ar gael sy’n cynnig cyfarwyddyd.  Gellir ystyried y strategaeth hon fel y cam cyntaf tuag at ddatblygu cyfarwyddyd cynllunio ar gyfer Bae Caerdydd, gan y bydd yn cael ei hadolygu’n flynyddol a bydd yn datblygu’n declyn a ellir ei ddefnyddio i orchymyn i ba gyfeiriad yr aiff projectau’r dyfodol.  Yn ogystal â chyfarwyddo’r gwaith o warchod y planhigion a’r anifeiliaid ym Mae Caerdydd, bydd y Cynllun hwn yn gweithredu fel teclyn i hyrwyddo’r Bae fel adnodd addysgiadol.